Washindi katika tuzo za watu

Na Mwandishi Wetu
FAINALI za kuwapata washindi wa Tuzo za Watu 2014 zilifikia tamati juzi ambapo washiriki kutoka katika tasnia ya Filamu, Muziki na habari walitunukiwa tuzo zao.

Katika tuzo hizo zilizoandaliwa na kampuni ya Bongo 5 Media Group kila mshindi katika kila kipengele alizawadiwa Milioni moja pamoja na Tuzo iliyobuniwa hapa nchini.

Katika kipengele cha mwongozaji wa Video anaependwa alieshinda ni Nisher Nisher akiwa amewaacha akina  Adam Juma na Mecky Kaloka.

Katika kipengele cha Video ya mwanamuziki wa kike inayopendwa ameshinda Lady Jaydee kupitia wimbo wake wa Yahaya akiwa amewashinda akina Feza Kesu na video ya Amani ya Moyo na ile ya Closer ya Vanessa Mdee.

Katika kipengele cha mwigizaji wa kike wa filamu anaependwa alieibuka mshindi ni Elizabeth Michael maarufu kama Lulu akiwa amewashinda akina Jacqueline Wolper na Wastara Juma.

Kwa upande Muigizaji wa kiume anependwa mshindi ni King Majuto akiwa amewashinda akina Jacob Stephen, JB, na Hemedy Suleiman, PHD.

Kwa upande wa mtangazaji wa redio anaependwa mshindi ni Millard Ayo wa Clouds FM akiwa amewaacha akina Hamis Mandi maarufu kama B12 wa Clouds FM na Mariam Kitosi wa Times FM.

Pia Millard Ayo aliibuka tena mshindi katika kipengele cha kipindi cha radio kinachopendwa  na kuviacha vipindi kama vile  XXl cha Clouds FM na Hatua Tatu cha  Times FM.

Mtangazaji wa Luninga anaependwa mshindi aliibuka Salum Kikeke wa Idhaa ya Kiswahili ya BBC akiwashinda akina Sam Misago wa  East Africa Television na Salama Jabir.

Kipindi cha Mkasi cha East Africa Television kiliibuka na ushindi na kuvishinda vipindi vingine kama vile Planet Bongo na Friday Night Live.

Juma Kaseja aliibuka na ushindi katika kipengele cha Mwanamichezo anaependwa akiwa amewaacha akina Mrisho Ngassa wa  Yanga na Mbwana Samatta wa TP Mazembe.

Marehemu Steven Kanumba aliibuka na ushindi katika filamu ya Ndoa Yangu huku Diamond Platinum naye akiiibuka na ushindi wa Video bora wa kiume kupitia wimbo wake wa My Number One.