Twiga Bancorp yawatengea wajasiramali wa vikundi Bilioni 5 nchi nzima, yaendelea kukopesha Bajaji na Pikipiki

Mkurugenzi wa Maendeleo ya Biashara wa Twiga Bancorp, Solomon Haule akimkabidhi funguo wa bajaji Mwenyekiti wa kikundi cha Chama cha Madereva wa Bajaji cha Mikocheni kwa Kairuki (Chamabavi) John Roberto baada ya kupewa mkopo huo wa bajaji

Mkurugenzi wa Maendeleo ya Biashara wa Twiga Bancorp, Solomon Haule akimpongeza Bi Shamsa saidi baada ya kukabidhi mkopo wa pikipiki

Mkurugenzi wa Maendeleo ya Biashara wa Twiga Bancorp, Solomon Haule akiwasha bajaji  huku pembeni yake (aliekaa) ni Mwenyekiti wa kikundi cha Chama cha Madereva wa Bajaji cha Mikocheni kwa Kairuki (Chamabavi) John Roberto baada ya kupewa mkopo huo wa bajaji

Bajaji zikiwa nje ya ofisi za Twiga Bancorp tawi la Mlimani City

Mkuu wa Idara ya mikopo kwa wateja wadogodogo wa benki ya hiyo, Joseph Malatula Twiga Bancorp akizungumzia kuhusiana na maendeleo ya mikopo kwa wateja hao.

Mkurugenzi wa Maendeleo ya Biashara wa Twiga Bancorp, Solomon Haule akimsaidia kuwasha bajaji mwanamama wa kikundi  kati ya waliopata mkopo kutokea benki hiyo.

Mkurugenzi wa Maendeleo ya Biashara wa Twiga Bancorp, Solomon Haule akiongoza wafanyakazi wa Twiga Bancorp kukabidhi funguo wa bajaji kwa kikundi cha Vikoba cha Mfugandege cha Yombo Mchimbo wakati wa hafla ya kukabidhi mikopo ya pikipiki na bajaji kwa vikoba vya jijini Dar es salaam.

 

Na Mwandishi Wetu

BENKI ya Twiga Bancorp imetenga Shilingi bilioni tano kwa ajili ya kuwakopesha  wajasiliamali nchi nzima kupitia vikundi vyao.

Hayo yalisemwa juzi na Mkurugenzi wa Maendeleo ya Biashara wa benki hiyo Solomon Haule katika hotuba yake aliyoisoma  niaba ya Afisa Mtendaji Mkuu wa benki hiyo, Cosmas Kimario wakati wa uzinduzi wa mikopo hiyo.

Uzinduzi huo pia ulienda sambamba na kukabidhi mikopo ya bajaji na pikipiki kwa vikundi kadhaa vya vikoba vya jijini Dar es Salaam, tukio lililofanyika katika tawi la benki hiyo lililopo Mlimani City.

Katika hotuba yake hiyo Haule alisema kuwa benki hiyo imedhaminia kumkwamua mtanzania wa kawaida katika changamoto kubwa za umaskini.

Alisema kuwa katika kutambua nafasi ya vikundi vya ujasiriamali katika kuwaendeleza wananchi kukabiliana na umaskini benki hiyo imeamua kutumia vikundi hivyo na kwa masharti ya nafuu.

Alisema kuwa benki ya Twiga inawasaidia bila ya kuwawekea vikwazo kama vile kuhitaji hati ya nyumba, shamba au taarifa zilizokaguliwa za kibenki ila wanachotaka kutoka kwao nia ya dhati ya katika kutumia mikopo hiyo kujikwamua na umaskini.

“Benki mbali na kuwapatia mikopo pia inawapatia elimu ya ujasiriamali inayojumuisha namna ya kutumia fedha zao kibiashara na njia mbadala ya kurejesha mikopo kwa wakati” alisema Haule.

Aliongeza kuwa benki hiyo baadae itaanza kukopesha mjasiliamali mmoja mmoja ambapo watalengwa zaidi wale wajasiriamali ambao wametoka katika vikundi hivyo waliokwisha vikopesha.

Kwa upande wake Mwenyekiti wa kikundi cha Chama cha Madereva wa Bajaji kilichopo Mikocheni kwa Kairuki (Chamabavi) John Roberto ambacho  kimekopeshwa bajaji moja alisema kuwa chini ya utaratibu huo wamekwishapata bajaji nane.

“ Sisi tangia mwaka jana tumekuwa tunakopeshwa na kisha tunarejesha kwa riba katika benki hii na baadae mwanachama huyo anaachiwa bajaji inakuwa ni ya kwake moja kwa moja tumenufaika na mpango huu”  alisema Roberto.